Ons streek bestaan uit ʼn saamwerkspan met ʼn hart vir hoop en ʼn visie om saam ʼn wesenlike verskil te maak deur hoop te skep vir die toekoms. Ons het omgeeharte en is taakgerig, gedrewe en passievol. Ons vestig takke, ontgin gemeenskappe en bied ondersteuning aan Ons Winkels deur die hele streek.

Mpumalanga- en KwaZulu-Natal-Noord-streek se span sluit ʼn streeksorganiseerder, Annemarie van Heerden, en assistent- streeksorganiseerders, Melissa Nel en Michelle Viljoen in. Daphne Kleinhans is ons Streeks- Administratiewe Beampte en Chris-Mari du Preez ons administratiewe beampte; saam sorg hulle dat die streek op administratiewe vlak floreer. Ons streeks- maatskaplike werkes Louise Zitzke en Maruné van Vreden, sorg vir maatskaplik gebaseerde gemeenskapsontwikkeling en hanteer aansoeke deur hulp te bied uit die Helpende Hand-netwerk, deur bronne te ontgin of deur verwysings.

Hierdie streek is bevoorreg dat Ons Plek Volksrust reeds ʼn gevestigde instelling is. Eldrike Geldenhuys is die bestuurder en haar span voorloper-onderwyseresse is Carla Joubert, Laurissa Hammond en Meanet Rothman. Vir almal van hulle is ons kleuters en naskoolkinders uiters belangrik, en hulle sorg vir fisiese, geestelike en emosionele versorging.

Ons streek bestaan uit 31 takke, 11 dorpsverteenwoordigers en 17 Ons Winkels. Ons fokus op die weerloses in die gemeenskap: ouer persone, persone met gestremdhede, kinders en gesinne. Ons glo opleiding is die sleutel tot selfontwikkeling en ons streef daarna om kinders te aktiveer met #mensiemoed.